Oktobermaant 2018

10. Oktober  Vörsittertreffen in Lüneburg

An de 10. Oktober hebben sük all de Vörsitters van de Butenoostfresenvereenen in Lümbörg truffen- ut Berlin, Bremen, Cuxhaven, Hamburg, Lüneburg, Osnabrück, Wilhelshaven usw.,  sük ut to tuusken,  wat in de enkelnden Vereenen geböhrt is un wat wi anners so gemeensam angahn könen.

Rut komen is d´rbi vör all, dat wi in 2020  weer een  Butenoostfresentreffen  maken willn, ditmal in Wilhelmshaven.
Ji könt jo all d´rup instellen mit jo Jahresplanungen: 20.-21. Juni 2020 is de Termin

….

11. Oktober Damenkring , 21. Oktober Klönschnacknamiddag… so as alltied ´n  moi Binannerkomen mit völ Spaß un Pläseer un so mennig good Proot van Dit un Dat.

….

27. Oktober: Uns Prootjetafel , daar waar wi  nix anners als Platt proten, un all de, de dat neet könen, bibrengen willn,  daar was ditmal  wat Besünners: To´n 1. Maal harr ik disse Veranstalten ok up uns Facebook-Sied ingeven. Un dat hett wahrhaftig well lesen un is komen! So  was dat  ´n heel goode Binannerkomen.
Helga, wi hebben uns bannig freit!

Weten ji noch wat ´n „Aantjebit“ is ? Un ´n Plünnenrieter ? Un wat de „Acht“  bedütt?
Kiekt doch ´nmaal  bi uns rin. Daar gifft dat in uns Moderspraak driest noch ´n Spierke wat to lehren. Wi deen uns frein!

 

Septembermaant 2018

An de 8. Sept.  gung  dat mit de Kring van ‚Pattdüütsch leevt‘ up Tour na Flensbörg.

Klock 7:30 stunn en grote Bus an de Bahnhoff  Bahrenfeld  un hett 12 Lü van uns Hambörger Butenoostfresen-Vereen upnohmen – van Harten begrött van de  Öllermann un sien Koppel Lü  van ‚Plattdüütsch leevt‘ – un een wunnerbar Dag mit völ Sünnschien un Bliedskupp namm sien Anfang.

Toeerst gung dat na dat Water-Slött in Glückbörg. En heel  fidele Föhrder in Dracht van  domaals hett uns alls wiest,  de Historie van dat Slött verklaart un van de Bedüden för `t europäisk Königdom  vertellt. Heel interessant was dat un overhoopt nich drög.

Man bi sovöl Wetenskupp, Namen un Daten kregen wi Smacht … Bi ´t Middageten  in`t Café Cenral  – daar gaff dat ´n lecker Büffet – wassen denn ok Maag un Hart bold weer tofree.

Denn gung ´t mit Schipp over de Förde na Flensbörg. Mit  en Stadtföhrerske  bünd wi dör de ollen Straaten langs de Förde gahn, hebben von Rum un Zucker hört un upleds ok  noch ´n lütt Sluck d´rvan probeert.

Fazit: En wunnerbar Dag!  Kumpelment un Dank an  Öllermann Golsch un sien Team för disse moje Utfohrt.

16. September: Uns Klönschnacknamiddag in dat Ristorante Opéra.

Nett as alltied en moje Namiddag, good besöcht un bi lecker Kok of ok  annerswat gung dat munter d´rher. Septembermaant is ja Plattdüütskmaant… wi hebben paar besünner Woorden weer lehrt. Hebb’n klaarmaakt, wat ´n Plünnenrieter is (Tuchhändler, etwas abwertend ist damit auch der fliegende Händler auf dem Markt gemeint) un uns de Kopp over ‚Aantjebitt‘ swaar maakt. Man wenn wi an uns Damenkring denken doon, denn is klaar, wat meent is: Aantjebitt nennt man (lt. Adolf Sanders) ein Entenloch im Eis, das durch das ständige Paddeln der Enten mit ihren Füßen offen bleibt. Und da an einer solchen Stelle immer die typischen Entengeräusche zu hören sind, vergleichen die Ostfriesen gerne eine fröhlich schnatternde Damengesellschaft damit; es heißt dann:
„t geiht d´rher as in’t Aantjebitt!“

30. September: Fahrt na Ilow to dat Facebook-Treffen : ‚Wi sünd Oostfresen un dat mit Stolt‘.

Ok in uns Oller bünd daar welken, de  Facebook-Frünnen hebben.
Un daarum bünd wi d’rhen fahrn.

`n lang Fahrt mit  Auto van Hambörg na Ihlow nahst Auerk over de Autobahn, man de Besök hett sük lohnt. Haast 100 Lü wassen daar binannerkomen. Van Harten begrött wegen de wiede Weg hebben wi uns daar wohlföhlt, ne Menge neje Kuntakten knütt, lecker wat eten, wat de Froolü sülvst anricht harren, mit Siegi sungen (he schrifft sülvst de Texten up Platt), wat Nejes over uns oostfreske Wappen hört, Klönschnack hatt mit uns   Präsident van de oostfreske Landskupp,  un uplesd ´n Keiertje na de Upstallsboom maakt, waar wi uns Tosamenhörigkeit weer wiest hebben : ‚Eala freya Fresena‘ . En lütt Video is d´rvan maakt worden un bi Facebook antokieken.

Een wunnerbar Dag.  Leve Frünnen, weest all mitnanner bedankt för disse moje Dag!

 

Augustmaant 2018

An de 18. August wassen wi na ´t ‚Museum für Arbeit‘

Bi herelk Sünnschien un Warmte hett uns dat Alsterschipp ‚St. Georg‘ van d‘ Jungfernstieg over die Binnen-/Buten-Alster un Overbeek-Kanal na dat Museum fahrn. Een wunnerbar Fahrt tüsken de Seilschippen un Booten langs de Villen un Husen.

Bi dat Museum was an de Dag ‚Hoffest‘ mit völ Gedrüüs, Musik un Spektakel unner de ‚Trude‘, de ‚Schildvortriebsmaschine‘, de sük 1997 unner  de Elv dörschneden hett. Dotieds was ‚Trude‘ de gröttste Maschin van disse Aart.
Wi hebben uns dat all ankeken, lecker wat eten, völ Spaß hatt un uns denn bi’t Ies-Schleckern verhaalt.
Danke Elisabeth, dat du dat all weer för uns utsöcht hest!

 

19. August: Klönschnacknamiddag

An disse Namiddag in dat ‚Ristorante opera‘ gung dat hoch her. De Ruum was haast to lüttjet för all uns neeisgierigen Liddmaten,  de – ut de Sömmerferien torügg – all hör  Belevnisse tuusken wullen.
Een wunnerbar, kommodig un lüstig Namiddag.

25. August: Protjetafel

Uns Plattproter wassen daar weer unner sük in ´t Ristorante opera.
Heiner harr een moi Vertellsel d´rbi, Almuth een Raadsel mit besünner Woorden ut de Köken,  un Susanne  een Geschicht van B. Brecht in ´t Plattdüütske oversett.
Driest noch wat to lehren in uns Moderspraak!

Julimaant 2018

An Fredag de 13. Juli 2018 wassen wi to ´n  Matjeseten in Glückstadt.

Wunnerbar lecker wassen de sülvern Deerkes un de braden Tuffels. Wi hebben düchtig tolangt.
Un wat ´n Bliedskupp, dat wi daar ok olle Frünnen weer  truffen hebben, Frünnen, de wegen dat Oller  un Krankheid de Weg to wied to uns na Hambörg worden is.

Een lütt Bummel noch dör de moje heimelige Straaten van Glückstadt un lecker Ies schleckern – denn gung dat weer mit Tog na Huus.

Junimaant

9./10. Juni: Butenoostfresentreffen in Jever:

De Butenoostfresen ut all de Oostfresen-Vereenen – ut Berlin, Bremen, Cuxhaben, Düsseldörp, Hambörg, Köln, Lümburg, Osnabrück, …treffen sük all twee Jahr in Oostfreesland, dat Lengen na de olle Heimat to stillen,  olle un neje Kontakten to knütten un olle Fründskuppen to plegen.
Ditmal gung dat na Jever(!) – un villicht was dat ok de Grund , so „butenoostfreesk“ binanner tokomen – dat wi neet so heel tofree wassen mit dat Treffen. Wi harren haast kien Gelegenheit mitnanner to proten – dat Programm harr daar kien Bott för laten.

De plattdüütske Preken in de Stadtkark an Sönndag was daar ´n wunnerbar Utgliek mit dat Thema:“Buten /Binnen“,  un na de Empfang bi d´ Börgmester was denn de Seel ok weer tofree!

Bericht ut dat „Jeversche Wochenblatt“ van 11. Juni 2108

 

23.Juni: Uns „Protjetafel“, uns Plattproterkring,

harr dat ditmal stur tegen de Footballers antokomen. Man wat ´n Bliedskupp: Daar hett sük ´n neei Lidd  anmellt, de extra um de Plattproteree komen is. Dat is uns wunnerbar topass: Wi begröten van Harten: Marianne Warntjes in uns Rieg un hopen, dat se sük wohlföhlen deit bi uns.
Moi, dat uns „Football-Weltmesters“ dat schafft hebben un vöreerst neet na Huus fahren mutten….Denn wo heet dat bi uns: Doon deit lehren , dat is ok uns „Drievkiel“, de Neetplattproters munter to maken.

 

30. Juni: Sömmerfest

`t is nu all weer ´n paar Dagen her, dat wi uns Sömmerfest bi Almuth un Martin in hör moje Tuun fiert hebben, man de Smaak van ´t Spanferkel liggt een noch up Tung. Dat was ´n Fest för d´Beck.. de Körst van ´t Swien nett so kross as Bladderddeeg!

Um 11 gaff dat Tee mit Krinthstuut, so as sük dat hören deit um disse Tied un ´n Brannwienskopp, denn wi harren up lütt „Johanna“ anstöten musst, de ´n paar Dagen ehrder up Welt komen was. Un namiddagds harrn  Elisabeth, Grete,Herma, Sigrid un Rena ´n Konditor Konkurrenz  maakt un heel lecker Koken ´uptafelt`!

Ok Petrus hett mit Warmte un Sünnschien sien Andeel d´rto doon, dat wi all völ Spaß un Bliedskupp harrn.
Uplesd hebbn wi noch ´n heel Sett  kommodig in de lüttje Laub seten un mit ´n Absacker dat Fest ulklingen laaten.
Dank an all de, de so flietig mithulpen hebben – in Köken , bi´t Teemaken, Inschenken , Schonmaken, Uprümen…dat Sömmerfest wahrhaftig to´n Fest to maken – dat hett Spaß maakt!
Ji – wi – bünd doch ´n wunnerbar Kring!

 

 

 

Maimaant 2018

In Maimaant hett Herma uns na Volksdörp ropen,  dat Museumsdörp  to besöken. Un dat was ´n wunnerbar Idee. Bi herelk Sünnschien hebben wi so  moje  Stünnen belevt, wassen heel versunken in Erinnern an uns olle Heimat,  denn nett so as uns dat daar wiest wurr, was dat bi uns in Oostfreesland ok.
Achteran hebben wi heel smakelk Middageten in dat Restaurant Hacienda nahst dat Museum un bünd denn weer torügg in dat lüttje, kommodige Museums-Café . Bi heel lecker Koken un Koffje kunnen wi unner de Appelboomen sitten – de Höhner lepen tüsken uns Beenen – un van froger Tiden proten: Weest du noch ?

    

    

April 2018

In Aprilmaant stunn ´n Barg Veranstalten bi uns in’t Programm: Damenkring, Prootjetafel  un an de 22. April wat Besünners:  Wi bünd tosamen mit een Föhrer bi herelk Sünnschien  dör de wunnerbar  Stadtpark keiert, hebben Bliedskupp an dat moje eerste Grön un all de Vörjahrsblomen hatt un uns völ  ‚Ditjes un  Datjes‘ van de Park verklaaren laten.

Bi lecker Eten in dat Landhuus Walter hebben wi uns van de Loperee verhaalt, um denn neeisgierig in’t Planetarium togahn un mit  een Shuttle na de Planet „Mars“ to flegen.

  

Grandios –  wo wi mit 3D – Brill up Nös – Künn van d‘ Loop van de Planeten kregen hebben. „Explore“  hett de 3 D Show  heten. Wi hebben  de Astronom Keppler  d‘ rbi over d‘ Schuller keken, hebben uns mit sien 3 Gesetzen utnanner sett un  uplesd  sogar in ‚t Cockpit van ’n Shuttle na  de Planet Mars seten!
Bi ’n Koppke Capucino in dat Planetarium -Cafe bünd wi weer up uns Eer ankomen – noch ’n bietje dusig van all dat Beleevde, man glückelk un tofree, weer faste Grund unner d‘ Foten to hebben.
Danke Elisabeth, dat du dat för uns organiseert hest!

Märt 2018

24. Märt:  

Uns 1. „Prootjetafel“ – heel un dall up ‚Platt‘ !

Dat is good togang komen – of wo een dat ok anners nömen kann: Daar hett ´n Aal upsmeten!
Mit Lievpien un Harttuckern hebb ik towacht: Of dat wall wat word? Wi Hambörgers  all tohoop un denn blot ‚oostfreesk‘ Plattproten?
Dünnerslag! Dat gung!! Un ok all de, de neet Platt mit hör Modermelk upsogen hebben, Platt neet to Huus lehrt hebben, hebben ´t probeert.
Wat hebben wi för’n Spaß hatt! Dat löppt! Wunnerbar!
Daar is wat los un ji könen driest ok noch wat lehren in uns Moderspraak.

All 4 Weeken an de 4. Saterdag in ´t Maant is dat sowied.
An de 28. April noch in dat Restaurant ‚Franziskaner, Colonnaden/Ecke Gr. Theaterstr.9 un denn ab Maimaant (26.) in uns neei ‚Tohuus‘ in dat ‚Ristorante Opera‘, Dammtorstr. 7
Dragt de 4. Saterdagen in `t Maant man futt in jo Kalenner in…. Daar is Spaß un ok wat to lehren garanteert!

25. Märt:

‚De Märt, de Märt , de röögt de Steert’… hett dat ja heten in de Riemsel van uns oll Lidd Gerd Rhauderwiek in uns Bladdje verleden Maant.
‚Vergrellt kiest ja de Winter noch mit Storm un Hagelschuren,. Doch tüskendör deit `t Sünntje doch dör de Wulken luren‘ …
Man de Kraft van ´t Sünntje ´hett neet langt all de Millionen van Krokussen, de in Husum vör ´t Slöss in de wunnerbar Park stahn in hör vulle Pracht un Moigheid to wiesen. De scharp Koll hett de Blömen neet upflören laaten. Spietelk!

Wi wassen mit uns Kring an de 25.03. up Tour d´rhen. Spaß und Bliedskupp hebben wi doch hatt , hebben Mojes up de ‚Kunsthandwerkermarkt‘ funnen, lecker Eten un uns de ‚griese‘  Stadt ankeken.
Elite-Reisebus hett uns daarno weer kumfortabel un kommodig na Hambörg brocht.
Wenn ´t ok iesig kolt was .. was doch een wunnerbar Dag!
   

Feberwaar 2018

Boßeln un Grönkohleten in Berne

Dat weer ‘n pläserelk, lüstig un smakelk Sönndag för uns all, de de Inladen van Alexandra, de Vörsitterske van de „Kleingarten -Verein Am Berner Wald“, folgt bünd.
Sneeistuven an Vörmiddag un daarmit Slackersneei up de Wegen kunnen de mehrsten van uns nich daarvan ofhollen, de  Boßel to smieten.

Ik sülvst weer nich daarbi, man de Deelnehmers kweemen mit koll Hannen, avers overglückelk  in de Vereensruum rin. Nu gaff dat völ to vertellen. Käthe un Reinhard weren de Spölbasen un hebben daarför sörgt, dat bi „Geel tegen Rood un Blau tegen Grön“ alls örnlik oflopen is. Geel het 5:2, un Blau 4:2 wunnen.

Man dat is nich van Belang.  Denn nu  begrött uns Alexandra un beedt uns totolangen: Grönkohl satt un alls wat dar tohört. Dat weer ‘n stevig smakelk Eten! As wi all stoppsatt weren, hett Almuth ‘n Kroon un ‘n Kohlstrunk hervorzaubert un Birgit as Kohlkönigin krönt. Dat gaff kräftig Hannenklappen. Bi anregt prootjen un prieswert Dranken klung de moje Dag ut. De Vörslag, sükse Tosamentreffen weer to doon, kreeg krachtig Bifall!                                                                                                     Carl Theodor

Jannewaar 2018

  Prost Neeijahr 2018 !

Mit Rullerkes und ´n Glaske Sekt bünd wi an de 14. Jannewaar 2018  Klock 12 dat neje Jahr angahn. Uns Weertslü in d´ Aalspeicher harren uns dat all kommodig inricht, ´n lecker Büffet upbaut un good inbött. So kunnen wi  uns Kraam up de Hauptversammeln gau in Swung brengen.

Daar stunn völ an: Waar geiht dat hen mit uns Vereen, wo word dat mit uns „Unnerdack“ (wi  bünd noch alltied  up Sök na een Lokal, dat uns topass is) un ´n neei Vörstand hett daar her musst.

Un dat  is d´rbi rutkomen: Uns olle Baas blifft ok de neei, ´n  tweden Baas hebben wi nu neet mehr, uns toverlatige Penningmesterske is ok de olle bleven. Man denn hett sük  `n neje   Schrieveske anboden. Well wat för ´n Bahntje hett,  könen ji up uns Sied: „Vörstand“ nakieken.

De Proot: „waar geiht dat langs mit uns Vereen“ hett ´n lang Tied düürt. Uns Problem: jungerde Lü hebben  minn Interesse mit so oll Lü – as wi dat nu bünd,  blot to´n Klönschnack binanner tokomen – un wi oll Lü könen mit de Interessen van de jung Lü neet mithollen.

Wi bünd overeen komen –  wi bruken:

                    1.  ´n Stammtisch för Jung Lü ,
                    2.  ´n Plattprootjetafel,
                     3.  ´n Bosselkoppel,
                     4.  ´n Warkkoppel för Bruukdom ,
                     5.  ´n Warkkoppel, de de Kontakten  to anner
                           Butenostfresenvereenen un in uns  olle Heimat plegen deit.

So kann daar villicht noch mehr Swung in uns Kram komen un uns Baas ´n bietje mehr Stön un Bistand kriegen.

Uplesd gaff dat noch wat Besünners: Uns Lidd Grete Hamann is nu 65 Jahr bi uns in ´d Vereen un hett daför van uns Baas  en Ehrenbreev kregen;
25 Jahr is uns Lidd Wilhelmine Alberts-Menck   bi uns. Wi freien uns, dat de beid so lang Jahren troo uns Vereen stahn hebben un hopen, dat dat noch lang Jahren so blieven kann.

                   

Tofree un mit ´n blied Gesicht na lecker Koffje un Botterkook gung uns Versammeln denn namiddags tegen Klock 5 to Enn.