Dat is nu all 1 Jahr her, dat wi hier wat ut uns Vereensleven vertellen kunnen. Dat Coranavirus hett uns Vereen siet uns Grönkohleten in ´t Landhuus Ohlstedt in Feberwaar 2020 fast in Greep! Kien Boßeln, kien Klönschnack, kien Paaskefüür, Sömmerfest of Stadtbummel…
All utfallen um so´n heel lüttje Virus. Spietelk!!!

Wi hebben WhatsApp- un E-Mail-Gruppen inricht, um de Kontakten to uns Liddmaten to plegen… man dat is blot ´n lüttje Drüppke up ´n heten Steen – as man so seggen deit. Dat Binannerkomen fehlt doch bannig.

Man ik hebb ok ´n frohen Botschaft: Daar hebben sük 3 neje Liddmaten bi uns inschreven un uns in disse düster Tied Hoop un Toversicht geven, dat de „Corona-Schiet“ ok weer vörbi geiht.
Wi seggen: „Willkomen in uns Rieg: Freya un Wilka Salverius ut Hambörg un Günter Pyell ut Emden. Ji bünd uns good topass!

So lett sük dat good an, un wi stahn fast in Verwachten, dat wi noch völ mitnanner utmaken könen.

Hier nu kört un knapp, wat bi uns trotz „Corona“ in ´t Jahr 2020 geböhrt is.
In Jannewaar un ok noch in Feberwaar 2020 harrn wi uns Veranstalten noch akkerat klaar kregen.. man in Märt, April, Mai gung daar nix.

In Junimaant, daar wassen de „Corona-Regeln“ ´n bietje upweekt. Heel vörsichtig hett sük an de 18. Juni en lüttje Kring van „corona-sluff“ Damen mit „Snutenpulli“ up Padd maakt un sük an d´ Dammtorbahnhoff truffen to´n lüttje Klönschnack in Planten un Bloomen – 10 Lü wassen dotieds tolaten – wi wassen 9 – un hebben uns Spaß hatt. Ok in de Alsterarkaden kunnen weer 10 Lü binannerkomen, un so hett uns Damenkring an de 2. Dönnerdag in´t Maant weer in lüttje „Besatzung“ weer tagen kunnt..

Wieder gung dat an de 3. Juli. 2020. Daar hett sük ´n lüttje Kring Damen up Padd na Glückstadt maakt, Matjeseten. `n lütt Söpke was d´r ok bi. Un uns Lidd Gisela hebbn wi daar ok truffen.

An de 12. August hebben uns Ehrenbaas Carl Theodor Heyer un sien Anneliese hör Diamanten Hochtied fiert.

An de „Polteravend“ daarför hebben wi de beid ´n Ehrenbogen an d´ Dör hangt, un hör mit n´Ständchen uns Glückwünsken daarbracht. 60 Jahr binanner un mitnanner… well kann dat all!.

Allens Gode för jo…. Villicht gifft ja noch ´n iesdern Hochtied na 65 Jahr. Blievt gesund!

Denn was dat sowied, de Regeln för dat Mitnanner up Straten un in Versammeln wassen neei regelt un wi hebben uns up uns Jahres-Reis na Oostfreesland maakt – van 25.-29. August gung dat na Leer.
Mit Zug bünd wi daar hen, Hannelore hett dat Organiseeren overnohmen un ok dat Hotel rutsöcht, dat Programm hebben wi denn in vör Ort künnige Hannen leggt: Almuth un Bernt Strenge ut Rhauderfehn. Wi hebben mitnanner sovöl Mojes un Neeies kennenlehrt, un uns ok so anfründjet, dat de beid nu Lidd bi uns ind´Vereen worden bünd…

Wi seggen: „Van Harten willkomen Almuth un Bernt. Ji bünd uns good topass! Wi freien uns up en good Mitnanner“!!

Dann gung nix mehr…. wegen „Corona“ wassen all Schotten dicht…

Man wi laten de Kopp neet hangen un uns dat Leven neet verdrießen. För uns Jahreshauptversammeln hebben wi van „boverste Stee “ de Verlöv de Versammeln toverdagen bit „Corona“ unner Kuntroll is.

Also: „Munterhollen, drinkt ´n lecker Koppke Tee un tövt noch ´n Settje, de Schiet geiht ok vörbi, un denn halen wi ´t all weer na“!
Blievt gesund !
Leckerst un Best Jo Almuth