Mit ´n Glaske Sekt un Rullerkes bünd wi an de 9. Jannewaar  2020 in uns `Stammlokal‘ Klippkroog in Altona dat neje Jahr angahn . Uns Weertslü harrn uns ’n prachtig  Fröhstück  serveert un so kunnen wi uns Kram up de Hauptversammeln gau  in Swung brengen.

Daar stunn völ an: Waar geiht dat hen mit uns Vereen? Well kann mitdoon bi uns ? Un ’n neei Vörstand hett daar her must!
Un dat is d’rbi rutkomen:  Uns olle 1. Baas Almuth Janßen-Hering blifft  ok de neje, man nu het se weer Stön van  Hannelore Jost as 2. Baas kregen.  Uns toverlatige Penningmesterske  is un blifft Irmhild Dunkelmann. Man ’n Schrieverske hebben wi neet  utkieken kunnt. Susanne Baumann hett sük as 2. Schrieverske för  de Protokoll-Schrieverei anboden.

Van Belang is, dat wi ‚Uns Blattje‘ – so as dat in uns moderne Tied in’t Internet mit E-Mail un Whatapp anliggt  – nu bloot mehr 1 x in’t Jahr  to Wiehnachten  mit de Post verstüren willn. Daar steiht denn alls von Belang  binnen, wat bi uns geböhrt is in’t Jahr un wat wi so vörhebben. So blieven wi ok mit all uns Liddmaaten un Frünnen, de neet  mit Internet utrüst bünd, in Kontakt un  wi sparen ’n Bült Geld .

Wat de  een nu sien Vördeel, dat is de anner villicht sien Schaa: denn mögelk is,  dat een uns Terminen  un Vörhebben ut ‚Uns  Blattje‘  ’nmal ok vergeten kann, of dat Blattje  neet to griepen is. Kien Bang: Wi hebben up Tied all uns ‚Aktiven‘  in Luur un erinnern per  Web-Sied, Whatsapp, E-Mail of facebook  wat ansteiht un van  Belang is.
Laat uns dat ’n Settje utprobeeren….

Leckerst un Best  Jo Almuth