Märtmaant 2019

24.03. Plattdeutscher Gottesdienst auf der Flussschifferkirche

  
Dat weer ´n besünner Namiddag för uns Vereen un seker ok för de Gemeen an de 24. Märt in de Flußschipperkark Hambörg. In ‘n plattdütske Gottsdeenst hett uns Pastor i.R. Timm ut Sinstorf de sture Geschicht van Abraham un sien Söhn Isaak verklaart. Wat Gott daar van Abraham verlangt, is för uns Minsken, ook för Gläubige, neet to begriepen un vör all neet  to doon, ok för de Pastor nich, so hett he uns seggt. Wat Gott för de Minsken mit sien Söhn tolaten hett, verlangt he van uns neet.   Dat seggt uns dat Enn van de Abrahamsgeschicht.
   
Wie Oostfresen hebben uns na de Gottsdeenst bedankt mit oostfrees Tee un Kook satt. Twee lang Tafels weeren unner Anwies van Heern Daberkow gau upboot, un sien Froo hett Almuth un hör Helpers de Kombüs för dat Teeklaarmaken overlaten.
As wi all Tee un Kook genoten, hett uns Baas Almuth för de Lü, de neet  Oostfresen bünd, de Teezeremonie mit all, wat daar tohört, verklaart. För uns all weer disse Sönndag  „Okuli“ in de Flußschipperkark ‘n arig moi Beleevnis!    Jo Carl Theodor