Jannewaar 2019

Moin mitnanner in 2019! 

Mit ´n Glaske Sekt un Rullerkes hebben wi  Klock 11 in d´“KlippKroog“ in Altona dat neje Jahr begrött un uns bannig freit, dat wi so frünnelk in ´t Restaurant upnohmen wurrn – de Disken moi indekt, Kersen up Tafel un soooon ´n lecker Fröhstück mit allens wat daar so tohören deit! Lecker!
Satt un tofree kunn wi denn in uns Hauptversammeln starten. ´t stunn kien Wahlen an un so gung dat denn ok futt in „medias res“.  An de Berichten van uns Baas un uns Penningmesterske was nix uttosetten,  un so hebben wi uns glieks mit dat Jahr 2019 befaat. Denn daar steiht uns  120 Jahr-Jubiläum in Oktobermaant up Plan.
`t is noch ´n Settje hin … man dat gifft völ to doon!
Un wunnerbar, daar hett sük Hülp anboden, de ik geern annehmen do. Hannelore is daar weer mit d´rbi, Jutta un ok Alex hebben Hülp bi Facebook toseggt, ´n Sömmerfest is andocht, ´n Reis weer na Oostfresland, Bosseln, Stadtdeeltouren, u.u.u.
Un denn driest weg is daar  dat Programm van uns „Prootjetafel“, daar waar wi uns Oostfreske Taal, uns Moden un Maneeren, uns Bruukdom plegen, Referenten to ostfr. Literatur un Historie inladen un ok völ Spaß d´rbi hebben.
Neet to vergeten uns „Damenkring“ de stadig   elke Maant an de 2. Dönnerdag in dat Alterarkadencafé  to ´n Klönschnack binannerkummt,  ´n heel Bült Spaß d´rbi hett un vör all to bruken is! De „steenharde Keern“ van uns Vereen. Danke, dat ji daar all mit d´rbi bünd.
So mutt ´t un kann ´t d´r hen!
Leckerst u Best Jo Almuth