Dezembermaant 2018

An de 8. Dezember wullen wi so heel gemödelk over de Wiehnachtsmarkt bummeln un harrn daarto ok uns Facebookfrünnen ut Hambörg un umto inladen. Ok ut Oostfresland wull ´n Koppel Lü komen van de Gruppe: ‚Wi sünd Oostfresen un dat mit Stolt‘ .

Man wi harren de Reken sünner Petrus maakt.  Storm, Regen un sogar ´n lütt Hagelschuur hett he stüürt, um sien Macht to wiesen. Man de harde Keern van uns Hambörger Butenoostfresen kuun he neet duken.
Nett uptied hebben  wi mit de Oostfreske  Abordnung  uns 11-Ührtje nohmen, lecker wat eten in dat ‚Vlet-Restaurant‘ , de neje U-Bahnstation ‚Elbbrücken‘ ankeken, Rüst bi uns ‚Elphi‘ hollen un daar sogar noch ´n lütt Video maakt un bünd uplesd denn mit uns Vereenslü  over de St. Pauli Wiehnachtsmarkt bummelt. Man dat was so kold, dat wi de een of anner  Grog un Wienkanneel drinken moten. Ja -wat mutt, dat mutt!  

15. Dezember: Uns Wiehnachtsfier in ´d „Deichgraf“

„18 in de Baalje“ hett dat heten, as wi na een lecker Labskaus-Eten uns Knobelbeker ruthaalt hebben un mit völ Spaß un Fliet de Dobbels smeten hebben.
Uns Wolfgang wasd´r neet uttosteken, he was de Best van uns un hett sük toeerst wat van all de mojen Priesen utsöken kunnt.  Na klaar, he is uns „Rekenkontroler“ un kann good mit Tallen umgahn!
Een moje Namiddag, festelk behagelk un vergnögelk un een wunnerbar Utklang ut `t Jahr 2018! Wi könen mit Stolt  un Bliedskupp torüggkieken un mit Toversicht un Moot dat neje Jahr angahn n ´t Motto:
An uns Doon wünsk ik uns Freid un dat ok allens klappen deit!“